Skip to main content

कहा कहा पुग्दैछ टेलिकमको अप्टिकल फाइबर?

सरकारी स्वामित्वको दूरसञ्‍चार सेवा प्रदायक नेपाल टेलिकमले सेवा विस्तारका क्रममा यस आर्थिक वर्षभित्र थप १३ जिल्ला सदरमुकामसम्म अप्टिकल फाइबर पुर्‍याउने भएको छ।
तीव्र गतिको इन्टरनेट सहित अन्य सेवालाई गुणस्तरीय बनाउन टेलिकमले यसैवर्षभित्र थप १३ जिल्लामा अप्‍टिकल फाइबर पुर्‍याउन लागेको हो। भूउपग्रहमार्फत दिइएको सेवाभन्दा अप्‍टिकल फाइबर प्रयोगले दिइने सेवाको गुणस्तर बढ्ने भएकाले टेलिकमले केही वर्षदेखि फाइबर बिछ्याउने कार्यलाई निरन्तरता दिएको छ।
प्रतिस्पर्धी बढेसँगै टेलिकमलाई सेवा विस्तार र सुधारमा दबाब परेकाले यसै वर्ष १३ जिल्लामा अप्‍टिकल फाइबर नेटवर्क विस्तार गर्न लागिएको टेलिकमका प्रवक्ता गुणकेशरी प्रधानले बताइन्। उनका अनुसार यस वर्ष ६ सय किलोमिटर अप्‍टिकल फाइबर विस्तार गर्ने योजना छ। ‘यसका लागि कम्पनी छानिसकेका छौं’, उनले भनिन्, ‘फाइबर विस्तारको काम सुरु भइसकेको छ।’ यो वर्ष अप्टिकल फाइबर विस्तार गर्ने जिम्मा चिनियाँ क्विनफेन कम्युनिकेसन कम्पनी लिमिटेडले पाएको छ। कम्पनीले काम सुरु गरिसकेको टेलिकमले जनाएको छ। ‘सर्वेक्षण र डिजाइन पूरा गरेर काम सुरु भइसकेको छ’, प्रधानले भनिन्, ‘यस वर्ष १३ जिल्ला थपिएपछि नेपालका ४७ जिल्लामा टेलिकमको आफ्नै अप्टिकल फाइबर नेटवर्क हुनेछ।’

यस वर्ष टेलिकमले सल्यान, म्याग्दी, गोर्खा, इलाम, पाँचथर, नुवाकोट, धादिङ, पाल्पा, गुल्मी, अर्घाखाँची, रुकुम, रोल्पा र सप्‍तरी सदरमुकाममा अप्‍टिकल फाइबर पुर्‍याउन लागेको हो। टेलिकमका अनुसार यसवर्षभित्र तुलसीपुर-सल्यान, बाग्लुङ-बेनी, आबुखैरेनी-गोर्खा, काठमाडौं-गल्छी-गजुरी, बुधबारे-फिक्‍कल-आइतबारे-इलाम-फिदिम, गल्छी-तारुकाघाट-त्रिशूली र तारुकाघाट-धादिङबेसी जोड्ने अप्‍टिकल फाइबर बिछ्याउने भएको छ। यसैगरी स्याङ्जा-गल्याङ, गल्याङ-पाल्पा, गल्याङ-बलेटक्सार, बलेटक्सार-वाङ्ला, वाङ्ला-सन्धिखर्क, सन्धिखर्क-खलंगा, खलंगा-लिवाङ, खलंगा-झिमरुक-लमही जोड्ने अप्टिकल फाइबर पनि यसै वर्षभित्र बिछ्याउने टेलिकमको योजना छ।
यसैगरी तराई क्षेत्रमा कञ्‍चनपुर-फत्तेपुर-राजविराज-सखडा, मोरङको उर्लाबारी-मधुमल्ला, रंगेली-उर्लाबारी र विराटनगर-विराटचोकमा पनि अप्‍टिकल फाइबर विस्तार हुने भएको छ। सुनसरीको दुहबी-इनरुवा र सिरहाको मिचैर्या र उदयपुरको कटारी पनि यसैवर्ष अप्टिकल फाइबरमा जोडिने भएका छन्।
टेलिकमले सडक र आवश्यक पूर्वाधार बनिसकेका स्थानमा जमिनमा गाडेर र अन्य क्षेत्रमा नेपाल विद्युत् प्राधिकरणसँगको साझेदारीमा अप्टिकल फाइबर विस्तार गरिरहेको छ। विद्युत् प्राधिकरणले बनाएको प्रसारण लाइनमा टेलिकमले पनि पोल र तार भाडामा लिएर अप्टिकल फाइबर लिंक विस्तार गर्ने गरेको छ। ‘सबै स्थानमा हाम्रो पूर्वाधार पुगेको छैन, भौगोलिक हिसाबले जमिनमुनिबाट लान पनि अप्ठ्यारो पर्छ’, उनले भनिन्, ‘त्यसैले प्राधिकरणसँग साझेदारी गर्ने गरिएको छ।’
टेलिकमले गत वर्ष सातवटा जिल्ला सदरमुकाममा अप्टिकल फाइबर विस्तार गरेको थियो। पूर्वपश्चिम राजमार्गमा पनि टेलिकमले अप्टिकल फाइबर बिछ्याएको छ। ७५ वटै जिल्लामा अप्टिकल फाइबर जोडेर उच्‍च गतिको इन्टरनेटसहित सबैखाले सेवा चलाउने योजनाअनुसार टेलिकमले विस्तार अभियान अघि बढाएको हो। टेलिकमले विस्तार गरेको अप्टिकल फाइबरले सार्क सूचना मार्गमा मुलुकलाई जोड्न समेत सहयोग गर्नेछ। सरकारले तीनबर्से योजना अवधिमा सबै जिल्ला सदरमुकाममा अप्टिकल फाइबर पुर्‍याउने रणनीति लिएको छ। यसलाई पूरा गर्न टेलिकमको विस्तारले सहयोग गर्नेछ।
चालू आर्थिक वर्षमा लगानी गर्न १५ अर्ब ९५ करोड रुपैयाँ छुट्याएको टेलिकमले टेलिफोन, इन्टरनेट र केबल टेलिभिजन समेत एकै साथ चलाउन मिल्ने नेक्स्ट जेनेरेसन नेटवर्क (एनजीएन) समेत सुरु गरेको छ। यो सेवा विस्तारका लागि अप्टिकल नेटवर्कले महत्त्वपूर्ण भूमिका निर्वाह गर्छ। टेलिकमका ग्राहकको संख्या गत जेठ मसान्तसम्ममा ८९ लाख ६४ हजार पाँच सय ९५ पुगेको छ। इन्टरनेट ग्राहकको संख्या ३१ लाख ७३ हजार पाँच सय ७६ पुगेको छ।

Comments

Post a Comment

Popular posts from this blog

खरानी र खण्डहरको देश- २

देशको वर्तमान अवस्थाबारे लेखूँ कि नलेखूँ भन्ने मनस्थितिमा केही त लेख्नै पर्ने भयो। ००० सत्ता र त्यसका मठाधीशप्रति वर्षौँदेखि नागरिक तहमा गुम्सिएको आक्रोश यो पटक नवपुस्ताको अगुवाइमा अभिव्यक्त भयो। त्यो स्वतःस्फूर्त थियो। स्वचालित थियो। त्यसको कथा वा पटकथा कसैले लेखिदिएको थिएन। नेतृत्व थियो न त्यसलाई अवतरण गराउने खाका र तयारी। त्यो एउटा आँधी थियो, हुरी थियो, भूकम्प थियो। देशका सबै नदीमा आएको थाम्नै नसकिने बाढी थियो। स्वतःस्फूर्त र नेतृत्वविहीन आन्दोलन परम्परागत दलले गर्ने जस्तो सङ्गठित हुँदैन। आन्दोलनकारीमा दलीय अनुशासन हुँदैन। लक्ष्य र उद्देश्यहरू स्पष्ट नहुन सक्छन्। उपलब्धिलाई संस्थागत गर्ने मार्ग प्रस्ट नहुन सक्छ। त्यो थाहा पाउन इन्टरनेट र सामाजिक सञ्जालको व्यापक उपयोगबाट आह्वान भएका पछिल्ला आन्दोलन र अभियान हेरे पुग्छ। विगत दुई दशकभित्र संसारभरि भएका कैयौँ आन्दोलनको विश्लेषण गर्दा हुन्छ। चाहे ती अमेरिकाका ‘टी पार्टी मुभमेन्ट’, ‘अक्युपाई वालस्ट्रिट’ हुन् वा अरब वसन्त, हङ्कङको छाता आन्दोलन अनि विभिन्न देशमा चलेको पछिल्लो ‘नेपोबेबी’ वा ‘नेपोकिड्स’ अभियान, ती सबैको नतिजा लगभग उस्तै देखिन...
Post a Comment
Read more

कविता

Tweet आङ साङ सुची विष्णु पोखरेल  मृत्युरेखा पार गर्दै गर्दा सम्झदैँ छु तिम्रा चम्किला आँखा जसमा देखिन्छन् प्रतिशोधका प्रतिच्छायाहरू थाहा छ तिमी बोल्न सक्ने छैनौ जसरी हिजो बोल्थ्यौ हास्न सक्ने छैनौ जसरी हिजो हास्थ्यौ र, यो पनि थाहा छ तिमी गर्जन सक्ने छैनौ बाघलेझैँ– जसरी नजरबन्दका बेला घरको कौसीमा निस्केर हात हल्लाउदै गर्जन्थ्यौ मृत्यु रेखा पार गर्दैगर्दा कुल्चिरहेछु, कैयौँ रात ढुकढुकी बिसाउन संघर्ष गर्दै प्राण त्यागेका आत्माहरू सुँघिरहेछु, तिनबाट निस्कने दुर्गन्ध नाघिरहेछु, पिताको छातिमा गोली वर्षदाकी तिमी जस्तै कैयौँ नानीको बलात्कृत जाँघबाट चुहिएका रक्तरेखाहरू ओ ! मेरी शान्ति र अहिंसाकी प्रतिमूर्ति ! म आफ्नै भूमीबाट घरबारविहीन भएर मृत्युरेखा पार गर्दैगर्दा तिमी भन्दैछौ– ‘मेरो देशले कसैलाई पनि घरबारविहीन बनाएको छैन’ मेरी प्यारी शान्तिकी प्रतिमूर्ति ! एकपटक तिम्रो बैठक कक्षमा जाऊ र, सोध भित्तामा झुन्ड्याएको अल्फ्रेड नोबेललाई ‘साच्चै म सत्य बोलिरहेकी छु ?’ सायद नोबेल आउँनेछ चिहानबाट उठेर अनि, भन्नेछ– ‘तिमी सत्य बोल्दैछौ वा असत्य मलाई थ...
Post a Comment
Read more