सूपथ मूल्य पसलभित्र केमा कति छु्ट?

दसैं–तिहार र छठ जस्ता चार्डपर्व नजिकिदै गर्दा सहुलियत दरमा उपभोग्य वस्तु उपलब्ध गराउने उद्देश्यले सरकारी संस्थानहरुले सुपथ मूल्य र घुम्ती पसल सुरु गरेका छन्।
संस्थानहरुले उपत्यका भित्र आठ र उपत्यका बाहिर २३ वटा सुपथ मूल्य पसल सुरु गरेका हुन्। उपत्यकाभित्र भने साल्ट ट्रेडिङ कर्पोरेसनले तीनवटा घुम्ती पसल समेत सुरु गरेको छ।
नेसनल ट्रेडिङ, साल्ट ट्रेडिङ, दुग्ध विकास संस्थान र खाद्य संस्थानले मिलेर यस्ता पसल सुरु गरेका हुन्। यी पसलमा दैनिक उपभोग्य वस्तु सहुलियत मूल्यमा किन्न पाइन्छ। उपत्यका भित्र साल्ट ट्रेडिङको कालिमाटी  र कोटेश्वर कार्यालय, नेसनल ट्रेडिङको टेकु र रामशाहपथस्थित कार्यालय, वल्खु तरकारी बजार, जावलाखेल, थापाथलीस्थित खाद्य संस्थान कार्यालय र भक्तपुरको सूर्यविनायकमा सहुलियत पसल सुरु भएका हुन्। यसैगरी बनेपास्थित साल्ट ट्रेडिङको कार्यालय सहित मुलुकका अन्य क्षेत्रका विभिन्न २२ स्थानमा रहेका संस्थानहरुका कार्यालय हातामा यस्ता पसल मंगलबारदेखि सुरु गरिएको हो।

राजधानीमा साल्ट ट्रेडिङले चलाएका घुम्ती पसलहरु भने दैनिकरुपमा उपत्यकाका विभिन्न क्षेत्रमा पुगेर ग्राहकलाई सेवा दिनेछन्। संस्थाले गाडीमा चिनी, चामल, दाल, तेल, नुनलगायतका उपभोग्य वस्तु राखेर ग्राहकलाई सेवा दिनेछ।
सूपथ मूल्य पसलमा ग्राहकले दैनिक उपभोग्य वस्तुदेखि औजार, उपकरणमा समेत विशेष छुट पाउनेछन्। पसलमा खाद्य संस्थानले विभिन्न खाले चामल र गँहु राखेको छ। नेसनल ट्रेडिङले औजार, उपकरण, टुल्स, विद्युतिय सामग्री, चामल र पिठो राखेको छ। यसैगरी साल्ट ट्रेडिङले चिनी, नुन, दाल, चामल, पिठो, तेल, चिया, मसला, बेसार, खोर्सानीलगायतका ३५ थरी उपभोग्य वस्तु बिक्रीका लागि राखेको छ।
‘हामीले चिनीमा १० रुपैयाँ र अन्य वस्तुमा कम्तिमा किलोमा ५ रुपैयाँ छुट दिएका छौ,’ ट्रेडिङका वरिष्ठ सहायक श्रृजन रेग्मीले भने, ‘नुनमा पनि प्रतिकिलो २ रुपैयाँ छुट छ।’ संस्थाले अधिकतम मूल्य ७६ रुपैयाँ तोकेको चिनी पसलमा भने ६६ रुपैयाँ किलोमा बिक्री गरिरहेको छ। यसैगरी खाद्य संस्थानले सबैखाले चामलमा प्रतिकिलो २ रुपैयाँ छुट दिएको रामशाहपथस्थित बिक्री डिपो प्रमुख गोविन्द गौतमले बताए। उनका अनुसार पसलमा जापानिज, अमेरिकन, मकवानपुरे र साबित्री चामल उपलब्ध छन्। यसैगरी गँहुमा पनि प्रतिकिलो २ रुपैयाँ छुट दिइएको छ।
दुग्ध विकास संस्थानले भने सुपथ मूल्य पसलमा ५१ थरी आफ्ना उत्पादन पसलमा राखेको छ। संस्थानले घिउमा मात्र छुट दिएको छ। पसलमा आउने ग्राहकले ६ सय ८० रुपैयाँ लिटरको घिउ ६ सय ७० रुपैयाँमा किन्न सक्नेछन्।
नेसनल ट्रेडिङले पसलमा राखेको हुलास ब्रान्डको चामल र पिठोमा २ प्रतिशत छुट दिएको छ। यसैगरी आइरन, राइस कुकर, प्रेसर कुकर, स्कुल ब्याग, कैची, आरा, टुल्स, जेनेरेटरलगायतका उपकरणहरुमा भने ५ देखि २५ प्रतिशतसम्म छुट दिइएको ट्रेडिङका सुपरभाइजर राजकुमार लामाले बताए।
मेलाको उद्घाटन गर्दै मुख्य सचिव लिलामणि पौडेलले सामान आपूर्तिमा समस्या भए सरकारले तत्काल समाधान गर्न पहल गर्ने आश्वासन दिए। उनले सूपथ मूल्य पसलमा गुणस्तरीय सामग्री सस्तोमा बिक्री गर्न संस्थानहरुलाई निर्देशन दिए।