गुणस्तरहीन तेल उत्पादकलाई थुनामा राख्न आदेश

विष्णु पोखरेल

काठमाडौं, भदौ ४

गुणस्तरहीन खाने तेल उत्पादन गर्ने दुई उद्योगका संचालकलाई पुर्पक्षका लागि थुनामा राख्न जिल्ला अदालत काठमाडौंले आदेश दिएको छ।

मापदण्ड विपरित तेल उत्पादन र बिक्री वितरण गर्ने रुपन्देहीको सिद्धार्थ आयल इन्डस्ट्री र विराटनगरको वागमती आयल इन्डस्ट्री विरुद्धको मुद्दामा अदालतले यस्तो आदेश दिएको हो। दुवै उद्योग विरुद्ध वाणिज्य विभागले उपभोक्ता संरक्षण नियमावली अनुसार कारवाहीको माग गर्दै मुद्दा दायर गरेको थियो।

उपभोक्ता संरक्षण ऐन र नियमावली बनेपछि गुणस्तरहीन उत्पादकलाई पहिलो पटक जिल्ला अदालतले यस्तो आदेश दिएको हो। अदालतको आदेश पछि वागमती आयलका तर्फबाट उपस्थित भएका प्रतिनिधी भागवत तिमल्सिनालाई पुर्पक्षका लागि थुनामा राखिएको छ भने सिद्धार्थका सञ्चालकलाई पक्राउ पुर्जी जारी गरिएको छ।

विभागले सरकारी वकिलको राय लिएर एक महिना अघि जिल्ला अदालतमा मुद्दा दायर गरेको थियो। करिब एक बर्ष अघि निरीक्षण अधिकृत नियुक्त गरेको विभागले दायर गरेको यो नै पहिलो मुद्दा हो। एक बर्ष अघि खाद्य तथा गुण नियन्त्रण विभागले परिक्षण गर्दा सिद्धार्थले उत्पादन गर्ने 'तेज' ब्राण्डको तोरी तेल एवं वागमतीले उत्पादन गर्ने 'सेलो' ब्राण्डको सूर्यमुखी तेल गुणस्तरहीन पाइएको थियो।

खाद्यको परिक्षण प्रतिवेदनका आधारमा विभागले सरकारी वकिल कार्यालयको राय लिई दुवै ब्राण्डका तेलको बिक्री रोकेर मुद्दा चलाएको हो। 'हामीले नियमावली बनेपछि चलाएको यो नै पहिलो मुद्दा हो,' विभागका महानिर्देशक अनिल ठाकुरले भने, 'गुणस्तरहीन उत्पादन गर्ने अरुलाई पनि यस्तै मुद्दा चलाउछौ।' मिसावटयुक्त र गुणस्तरहीन तेलका कारण जनस्वाथ्यमा असर पर्ने देखिएकाले विभागले कारवाहीको लागि मुद्दा चलाएको ठाकुरले बताए।

उपभोक्ता संरक्षण ऐन र नियमावलीमा गुणस्तरहीन उपभोग्य वस्तुको उत्पाद तथा बिक्री वितरण गर्नेलाई ५० हजार जरिवाना देखि २ बर्ष सम्म जेल सजाय गर्न सकिने व्यवस्था छ। यस्ता उत्पादनले कसैको ज्यान गएमा भने ५ लाख जरिवाना वा १४ वर्ष सम्म जेल सजाय हुन सक्ने अधिवक्ता एवं उपभोक्ता हित संरक्षण मञ्चका सचिव रामकृष्ण सिम्खडाले बताए।