काठमाडौं, असोज १६–दसैं–तिहारमा सहुलियत दिने भन्दै सरकारी संस्थानहरुले एकिकृतरुपमा सुरु गरेको सुपथ मूल्य पसलमा दाल, चामल, नुन, चिनीभान्दा मदिरामा धेरै छुट पाइने छ।
संस्थानहरुले आफ्ना सिमित दैनिक उपभोग्य उत्पादनमा छुट दिएका छन्। तर, डिउटी फि्र सप समेत चलाउने नेसनल ट्रेडिङले भने अरु सामानको तुलनामा धेरैखाले मदिरामा छुट दिएको छ।
नेपाली चार्डवार्डमा पश्चिमी शैलीको प्रभाव बढेको देखेर होला, कम्पनीले पनि आफुले बेच्ने ह्विस्की, ब्रान्डी र वाइनका विभिन्न ब्रान्डमा १० देखि २५ प्रतिशतसम्म छुट दिएको छ। कम्पनीले ह्विस्कीमा १० र ब्रान्डी एवं वाइनमा २५ प्रतिशत छुट दिएको छ।
यत्ति मात्र हैन, ७५ हजारभन्दा बढीको मदिरा किन्नेले छ एकमुष्ट १४ प्रतिशत छुट पनि पाउने छन्। योभन्दा कम रकमको किन्नेले पनि १० प्रतिशत छुट पाउने छन्। हाइल्यान्ड गोल्ड, क्याटस, ह्यान्की ब्यानिस्टर, स्ट्यावार्ड, ह्वाइटमिस्सीलगायतका मदिरामा भने छुटको व्यवस्था छैन।
सरकारी संस्थानहरुको सहभागितामा राजधानीको कालिमाटी, टेकु, भद्रकाली, थापाथली, कोटेश्वर र ललितपुर विशालबजारमा यस्ता पसल सुरु गरिएको छ। यी पसलमा साल्ट टे्रडिङ, खाद्य संस्थान, नेशनल टे्रडिङ र दुग्ध विकास संस्थानले एकिकृतरुपमा उपभोग्य सामग्री राखेका छन्।
कालिमाटीस्थित साल्ट ट्रेडिङको केन्द्रिय कार्यालय, टेकुस्थित नेसनल ट्रेडिङको केन्द्रिय कार्यालय, भद्रकालीस्थित नेसनल ट्रेडिङको बिक्री कक्ष, थापाथलीस्थित खाद्य संस्थानको अञ्चल कार्यालय, कोटेश्वरस्थित साल्ट ट्रेडिङ कार्यालय र पुल्चोकस्थित ललितपुर विशालबजारमा पसल राखिएका छन्।
सुपथ मूल्य पसलमा साल्ट ट्रेडिङले नुन, चिनी, तेल, दाल, पिठो, ग्यास, रेगुलेटरलगायतका सामग्री राखेको छ। कम्पनीले नुनमा २ र चिनीमा ५ रुपैयाँ छुट दिएको छ। यी पसलमा ग्राहकले चिनी ७१ रुपैयाँ र नुन १३ रुपैयाँमा किन्न सक्नेछन्।
यसैगरी खाद्य संस्थानले ६ थरी चामलमा छुट दिएको छ। संस्थानले सबै चामल किलोमा २ रुपैयाँ घटाएर बिक्री गरेको हो। यी पसलमा ग्राहकले वास्मती चामल किलोको ६५, सोना मन्सुली किलोको ३४, जिरा मसिनो किलोको ४६, मकवानपुरे किलोको ३०, जापानी किलोको ४० र अमेरिकी चामल किलोको ४६ रुपैयाँमा किन्नसक्नेछन्।
दुग्ध विकास संस्थानले भने ४२ उत्पादन सुपथ मूल्य पसलमा राखेको छ। ४२ वस्तुमध्ये संस्थानले घिउ भने लिटरमा १० रुपैयाँ छुट दिएको छ। अन्य वस्तुको भाउ भने पहिलेकै रहेको छ। नेसनल ट्रेडिङले मेसिनरी सामान, विद्युतिय सामान, मदिरालगायतका सामग्री पसलमा राखेको छ। कम्पनीले जेनेरेटरबाहेकका मेसिनरी सामानमा ४० प्रतिशत, अन्य घरायसी सामग्रीमा २० प्रतिशत, विद्युतिय सामग्रीमा २५ प्रतिशत छुट दिएको छ।
मंगलबार राजधानीका ६ स्थानमा मात्र सुरु भएको सुपथ मूल्य पसल केही दिनभित्रै भक्तपुरमा पनि सुरु हुनेछ। यसैगरी नेसनल ट्रेडिङले आफ्ना कार्यालयहरु रहेका मुलुकभरका ६ वटा जिल्ला, खाद्य संस्थानले मुलुकका विभिन्न २२ स्थान र साल्ट ट्रेडिङले मुलुकभरका २१ स्थानमा आफ्ना सामग्रीमा राजधानीमा दिएको छुट दिने जनाएका छन्।
Comments
Post a Comment