एनसेलको पुँजी बृद्धि तथा व्यवसाय विस्तार रोक्न निर्देशन

Tweet

कर नतिरी एनसेललाई पुँजीबृद्धि तथा व्यवसाय विस्तार गर्न नदिन व्यवस्थापिका–संसदको अर्थ समितिले निर्देशन दिएको छ । समितिको कार्यालय सिंहदरबारमा शुक्रबार बसेको बैठकले एनसेलको सेयर बिक्रीमा लाग्ने पुँजीगत कर र लाभ कर असुल उपर गरि समितितलाई जानकारी गराउन अर्थ मन्त्रालयलाई निर्देशन दिएको छ ।

यसैगरी समितिले पुरानो कारोबारमा कर असुल उपर नगराउने कर्मचारी तथा सम्बन्धित निकायलाई छानविन गरि कारबाहीको दायरामा ल्याउन सरकालाई निर्देशन दिएको छ । समितिका सभापति प्रकाश ज्वालाले भने, 'एनसेलाई पुरानो कारोबारमा कर असुल नगराउने को-को हन् ? सम्बन्धित निकायका कर्मचारीमाथि छानविन गरेर कारबाही गर्न निर्देशन दिएका छौं ।'

यस्तै समितिले एनसेलको सबै कर असुल उपर नभइकन पुँजी बृद्धि गर्न तथा व्यवसाय विस्तारका सबै कार्यहरु रोक्न समेत उद्योग मन्त्रालयलाई निर्देशन दिएको हाे ।

समितिमा एनसेलका प्रबन्ध निर्देशक सिमोन पार्किसलाई बोलाएर सांसदहरुले कारोबारबारे सोधपुछ गरेका थिए । समितिले आन्तरिक राजश्व विभागका महानिर्देशक चुडामणि शर्मा, राजश्व सचिव राजन खनाल, नेपाल दूरसञ्चार प्राधिकरणका अध्यक्ष दिगम्बर झा, सञ्चार सचिव दिनेश थपलिया लगायतलाई बोलाएर 'एनसेल काण्ड' बारे जानकारी लिएको थियो ।